ဖောက်သည်မြဲဖို့ အလိုက်သိပါ

စားသုံးသူရဲ့ အကြိုက်နဲ့ သုံးသပ်ချက်ကို သိအောင်လုပ်ရတာဟာ လုပ်ငန်းရှင်တယောက်အနေနဲ့ မဖြစ်မနေလုပ်ရမယ့် အလုပ်တွေထဲမှာ ထိပ်ဆုံးက ပါဝင်ပါတယ်။ ကြီးကြီးကျယ်ကျယ်ပြောရရင် Customer Satisfaction Survey လုပ်ရတယ်ပေါ့။

ထမင်းဆိုင် ပိုင်ရှင်တယောက်ဟာ စားသုံးသူကို “အရသာ အဆင်ပြေရဲ့လားရှင်၊ ဘာလိုအပ်ပါသေးလဲရှင် . .” စသည်ဖြင့် လာလာမေးနေတာဟာ သူ့လုပ်ငန်းကို ကောင်းသည်ထက် ကောင်းအောင်ပြုပြင်မွမ်းမံဖို့ သုတေသနလုပ်နေတာပါပဲ။ ဘဏ်တွေမှာ လာရောက်သုံးစွဲသူတွေကို ဝန်ဆောင်မှုနဲ့ပတ်သက်လို့ မေးခွန်းတွေ မေးမေးနေတာ၊ ဟိုတယ်တွေကနေ တည်းခိုသူကို စိတ်ကျေနပ်မှုရှိ-မရှိ မေးမြန်းတာတွေဟာလည်း အခြားပြိုင်ဘက်တွေနဲ့ ယှဉ်ပြိုင်ရပ်တည်နိုင်ဖို့ သုတေသနလုပ်နေကြတာ ဖြစ်ပါတယ်။

လုပ်ငန်းတခုကို အောင်မြင်အောင်၊ ကျရှုံးအောင် လုပ်နိုင်တဲ့ အကြောင်းတရား တဒါဇင်လောက်ရှိတဲ့အထဲမှာ စားသုံးသူ စိတ်ကျေနပ်မှုရရှိရေးဟာ တခုအပါအဝင်ဖြစ်ပါတယ်။ ကိုယ့်ကုန်ပစ္စည်းနဲ့ ဝန်ဆောင်မှုကို စိတ်တိုင်းကျပြီး သစ္စာရှိရှိနဲ့ ပုံမှန်အားပေးတဲ့ ဖောက်သည်တွေ ရှိလာမှ သင့်လုပ်ငန်းဟာ ရေရှည်ရပ်တည်နိုင်မှာ ဖြစ်ပါတယ်။

စားသုံးသူစိတ်ကျေနပ်မှုဆိုတာ လိုရင်းတိုရှင်း အဓိပ္ပာယ် ဖွင့်ရရင် “စားသုံးသူမျှော်လင့်ထားတာတွေကို သင့်ကုန်ပစ္စည်း (သို့မဟုတ်) ဝန်ဆောင်မှုက ဘယ်လောက်ထိ ဖြည့်ဆည်းပေးနိုင်သလဲ” ဆိုတဲ့ အနေအထား တစ်ရပ်ပါပဲ။ “a measurement that determines how products or services provided by a company meet customer expectations” လို့ အင်္ဂလိပ်လို ပြောကြပါတယ်။ ဒီနေရာမှာ မျှော်လင့်ချက်ဆိုတဲ့ စကားရပ်ကို အထူးသတိပြုပါ။ ကိုယ်ပေးလိုက်တဲ့ တန်ရာတန်ကြေးအတိုင်း ပြန်လိုချင်တဲ့ ကုန်ပစ္စည်းနဲ့ ဝန်ဆောင်မှုလို့ပဲ ဆိုကြပါစို့။

ဥပမာတစ်ခုပြောရရင် စားသောက်ဆိုင်တွေမှာ ကျွန်တော်က –

(၁) အကြာကြီး စောင့်ရတာမကြိုက်ဘူး။

(၂) ဟင်းပွဲမှာလိုက်ပြီဆိုရင် လွန်ရောကျွံရော နာရီဝက်လောက်နဲ့ ရောက်လာစေချင်တယ်။

(၃) ဟင်းပွဲနောက်ကျမယ်ဆိုရင်လည်း နောက်ကျမယ့်အကြောင်း ပွင့်ပွင့်လင်းလင်းပြောထားစေချင်တယ်။

ဒါတွေဟာ ကျွန်တော်အပါအဝင် စားသုံးသူအားလုံးရဲ့ အခြေခံမျှော်လင့်ချက်တွေပါ။ ကျွန်တော် အမှတ်တမဲ့ဝင်ထိုင်လိုက်တဲ့ စားသောက်ဆိုင်တခုဟာ အစားအစာ မှာလိုက်တဲ့အခါ နာရီဝက်လည်း ပေါ်မလာ၊ လေးဆယ့်ငါးမိနစ်နေလည်း ပေါ်မလာ၊ ဘာမှာလည်း လာရှင်း မပြ၊ ဖြတ်သွားဖြတ်လာလုပ်နေတဲ့ စားပွဲထိုးတွေကို ဆယ်ခါလောက် သတိပေးခါမှ စားပွဲကို အစားအစာရောက်လာတယ်ဆိုပါတော့။ ဒီစားသောက်ဆိုင်ရဲ့ ဟင်းပွဲက ဘယ်လောက်ပဲ အရသာကောင်းကောင်း ကျွန်တော်ဟာ နောက်တခေါက်လာစားချင်စိတ် ပျောက်သွားပါပြီ။ ဘာလို့လဲဆိုတော့ ဒီဆိုင်ဟာ စားသုံးသူရဲ့ မျှော်လင့်ချက်(၃)ရပ်လုံးကို ဖြည့်ဆည်းပေးနိုင်စွမ်း လုံးဝမရှိလို့ပါ။

ဒီနေရာမှာ စားသောက်ဆိုင်ဟာ ကျွန်တော့်လို ကြုံတွေ့ရတဲ့ စားသုံးသူတွေရဲ့ အခြေအနေနဲ့ စိတ်ကျေနပ်မှုကို အလေးအနက်ထားပြီး သိအောင်လုပ်တတ်မယ်ဆိုရင် လူကျနေလို့ပဲဖြစ်ဖြစ်၊ အကြောင်းအမျိုးမျိုးကြောင့်ပဲ ဖြစ်ဖြစ် ဟင်းပွဲတွေ ကြန့်ကြာတတ်တဲ့ပြဿနာကို ဖြေရှင်းပေးဖို့ ကြိုးစားတော့မှာပါ။ မဖြေရှင်းနိုင်သေးဘူးဆိုရင်တောင် စားသုံးသူ စိတ်ကျေနပ်ဖို့ ကျကျနန လာရှင်းပြတာပဲဖြစ်ဖြစ်၊ ခပ်မြန်မြန်ရနိုင်တဲ့ ဟင်းပွဲကို ပြောင်းမှာဖို့ လမ်းညွှန်တာပဲဖြစ်ဖြစ် လုပ်ပေးနိုင်မှာပါ။ ဒါပေမယ့် ခုလိုစားသုံးသူရဲ့ မျှော်လင့်ချက်ကို သိအောင်မကြိုးစားတဲ့အတွက် သစ္စာရှိရှိ အားပေးမယ့် ကျွန်တော့်လို စားသုံးသူတစ်ဦးဆုံးရှုံးရမယ့်အပြင် ကျွန်တော်က တွေ့သမျှလူတိုင်းကို ဝန်ဆောင်မှုညံ့ကြောင်း ဖောက်သည်ချနေဦးမှာ ဖြစ်တဲ့အတွက် နောက်ထပ်ဖောက်သည်တွေကို ပါထပ်ဆုံးရှုံးသွားရပါတယ်။ ကျွန်တော်တို့ ခုလို ဆက်ပြီး အားမပေးတော့တဲ့အတွက် အဲဒီစားသောက်ဆိုင်အနေနဲ့ အနာဂတ်မှာလည်း ဟင်းပွဲပေါင်းများစွာ မရောင်းရတော့ဘဲ နစ်နာသွားပါတယ်။

ဒါကြောင့် ဘယ်လောက်သေးငယ်တဲ့ စီးပွားရေးလုပ်ငန်းပဲ ဖြစ်ဖြစ် စားသုံးသူရဲ့ စိတ်ကျေနပ်မှုကို ရဖို့ စားသုံးသူရဲ့ မျှော်လင့်ချက်ကို သိအောင်လုပ်ဖို့ သိပ်အရေးကြီးပါတယ်။ သုတေသနလုပ်ဖို့ လိုပါတယ်။

သုတေသနလို့ ပြောလိုက်လို့ ငွေကုန်ကြေးကျတွေ ခံပြီး ကြီးကြီးကျယ်ကျယ် မေးခွန်းလွှာတွေနဲ့၊ ဘာနဲ့ လုပ်ရမယ်လို့ ကျွန်တော် မဆိုလိုသေးပါဘူး။ ‘ဆင်လည်း ဆင့်အထွာ၊ ဆိတ်လည်း ဆိတ်အထွာ’ ဆိုသလို အသေးစားလုပ်ငန်းရှင်တယောက်အနေနဲ့ အသေးစားသုတေသနတရပ်ကို အောက်ပါအတိုင်း လုပ်လို့ရပါတယ်။ အဆင့်(၃)ခုပဲရှိပါတယ်။

(၁) စားသုံးသူဘက်ကနေ တွေးကြည့်ပါ။

ကိုယ်သာ စားသုံးသူတယောက်ဆိုရင် ဘယ်လိုမျှော်လင့်ချက်မျိုးတွေရှိမှာလဲ။ ဘယ်လိုအဆက်ဆံခံချင်သလဲ။ ဘယ်လိုကောင်းကောင်းမွန်မွန်ဆောင်ရွက်ပေးစေချင်သလဲ။ စာရင်းလုပ်ကြည့်ပါ။ သင့် ဘဝတလျှောက်လုံးမှာ ဝယ်ယူ၊ အသုံးပြုခဲ့သမျှ ကုန်ပစ္စည်းနဲ့ ဝန်ဆောင်မှုတွေထဲမှာ အကောင်းဆုံး၊ အဆင်အပြေဆုံး လုပ်ငန်းတွေက ဘယ်လို အလုပ်လုပ်ကြသလဲ။ အညံ့ဆုံးလုပ်ငန်းတွေက ဘယ်လိုဘယ်ပုံ ချာတူးလံခဲ့ကြသလဲ။ မှတ်မိသလောက် ချရေးကြည့်ပါ။

(၂) Facebook စတဲ့ လူမှုကွန်ရက်စာမျက်နှာတွေက စားသုံးသူရဲ့ မှတ်ချက်တွေကို လိုက်ဖတ်ပါ။

စီးပွားရေးလုပ်ငန်းတွေရဲ့ လူမှုကွန်ရက်စာမျက်နှာတွေက review တွေ comment တွေကို ဆိုလိုပါတယ်။ ဝန်ဆောင်မှုကောင်းရင်ကောင်းသလို စားသုံးသူတွေက ချီးမွမ်းခန်းဖွင့်ထားတာကို တွေ့ပါလိမ့်မယ်။ ညံ့ရင်ညံ့သလို ကွန်ပလိန်းလာတက်ကြတာတွေကို တွေ့ပါလိမ့်မယ်။ ဒီလိုမှတ်ချက်စကားတွေကို များများစုဆောင်း လေ့လာပါ။ သင့်အတွက် ဆောင်ရန် ရှောင်ရန်တွေ အများကြီး ထွက်လာပါလိမ့်မယ်။

(၃) စားသုံးသူကို မေးပါ။ စောင့်ကြည့်လေ့လာပါ 

အခြေခံအားဖြင့် ကိုယ့်လုပ်ငန်းရဲ့ လိုအပ်ချက်ကို သိလာအောင် မေးရမှာ ဖြစ်ပါတယ်။ စားသုံးသူရဲ့ မျှော်လင့်ချက်ဆိုတာ ကိုယ့်လုပ်ငန်းရဲ့ လိုအပ်ချက်တွေကို မေးရာကနေ သိလာပါလိမ့်မယ်။ စားသုံးသူကို “အဆင်ပြေရဲ့လား၊ စိတ်ကျေနပ်ရဲ့လား” ဆိုတဲ့ မေးခွန်းလောက်ပဲ မေးပြီး ရပ်မသွားပါနဲ့။ မြန်မာလူမျိုးတွေဖြစ်တဲ့အပြင် သင်လုပ်နေတာကလည်း အသေးစားလုပ်ငန်းဖြစ်တဲ့အတွက် စားသုံးသူအများစုက အားနာစွာနဲ့ပဲ “အဆင်ပြေပါတယ်” လို့ ဖြေတတ်ကြပါတယ်။

ဒါကြောင့် အတွင်းကျကျထပ်ပြီးသိရဖို့ မေးခွန်းတွေ ဆက်မေးပေးပါ။ စိတ်ရှည်လက်ရှည်နားထောင်ပေးပါ။ သင်က ကုန်ပစ္စည်းရောင်းတယ်ဆိုရင် (သို့မဟုတ်) “ဘာပစ္စည်းတွေ ထပ်တင်ပေးရမလဲ။ ဘာတွေမှာပေးရမလဲ။” ဆိုတာမျိုး၊ “ဘာအားနည်းချက်တွေရှိလဲ၊ ဘယ်နေရာတွေမှာ အဆင်မပြေတာရှိလဲ။” ဆိုတာမျိုး မေးလို့ရပါတယ်။ ဝန်ဆောင်မှုဆိုရင်လည်း “ဝန်ဆောင်မှုနဲ့ပတ်သက်ပြီး အဆင်မပြေတာရှိရင်ပြောပါ” လို့မေးရပါမယ်။ ဒီနေရာမှာ မေးခွန်းမေးရတဲ့ ရည်ရွယ်ချက်ကို မဖြစ်မနေ ထည့်ပြောပေးဖို့ သတိပေးချင်ပါတယ်။ “အကို/အမ နောက်တခါ ဝယ်ယူအားပေးတဲ့အခါ ပိုအဆင်ပြေစေချင်လို့ပါ/ ပို စိတ်ချမ်းသာအောင်လို့ မေးရတာပါ” လို့ မေးခွန်းရဲ့နောက်မှာ တဆက်တည်း ထည့်ပြောပေးဖို့ မမေ့ပါနဲ့။ ဒီလို အကြောင်းရင်းလေးထည့်ပြောမှသာ စားသုံးသူက လိုလိုလားလား ဖြေချင်စိတ်ပေါက်မှာ ဖြစ်လို့ပါ။

ဒီအဆင့်ဟာ မေးခွန်းလောက်နဲ့တင် မလုံလောက်ဘဲ စားသုံးသူကို စောင့်ကြည့်လေ့လာနေရမှာဖြစ်ပါတယ်။ စောင့်ကြည့်လေ့လာတယ်ဆိုတာ သင့်ကုန်ပစ္စည်း၊ ဝန်ဆောင်မှုကို သုံးစွဲနေတဲ့အချိန်မှာ စားသုံးသူဘက်က ထွက်ပေါ်လာတဲ့ တုန့်ပြန်မှု၊ မှတ်ချက် စတာတွေကို လေ့လာတာကို ဆိုလိုပါတယ်။ သင်ဟာ စားသောက်ဆိုင်ပိုင်ရှင်ဆိုရင် ဆိုင်မှာထိုင်နေတဲ့ သူတွေရဲ့ မျက်နှာအမူအယာ၊ ဟန်ပန်စတာတွေကို အမြဲအကဲခတ်နေပြီး မေးစရာရှိတာ သွားမေးဖို့ လိုပါတယ်။ စားသုံးသူကို တိုက်ရိုက်မမြင်ရတဲ့ စီးပွားရေးလုပ်ငန်းမျိုးကို သင်လုပ်နေတယ်ဆိုရင်လည်း သင့်လူမှုကွန်ရက်စာမျက်နှာမှာ တက်နေတဲ့ မှတ်ချက်စကား၊ အကြံပြုစကား စတာတွေကို လေ့လာနေရမှာ ဖြစ်သလို မှတ်ချက်ပေးချင်အောင်လည်း အမြဲဖိတ်ခေါ်နေရမှာ ဖြစ်ပါတယ်။

မိမိတို့စီးပွားရေးတွေ ဖောက်သည်မြဲစေဖို့ အလိုက်သိကြပါစို့ ...