လက်တွေ့ကျကျရှုမြင်ရမယ့် ဈေးဝယ်သူရဲ့ စရိုက်

 

• “စတိုးဆိုင်မှာ တထောင်လောက်နဲ့ရတဲ့ ဒိန်ချဉ်ကို မဝယ်ဘဲ အချို့စားသုံးသူတွေဟာ စူပါမားကတ်က/ အော်ဂဲနစ်ဆိုင်က လေးငါးထောင်ပေးရတဲ့ ဒိန်ချဉ်ကို ဝယ်သောက်ရတာလဲ။”
• “မိုဒယ်ချင်းတူပြီး အလုပ်လုပ်ပုံချင်းတူတဲ့ တိုယိုတာနဲ့ လပ်ဇပ် အမှတ်တံဆိပ် ကားနှစ်စင်းယှဉ်ရင် ဈေးနှစ်ဆလောက်ပိုများတဲ့ လပ်ဇပ်ကိုပဲ ဝယ်စီးချင်ကြတာလဲ။”
• “ဝန်ဆောင်မှုချင်းတူတဲ့ ကုမ္ပဏီ(၃)ခုရဲ့ ဈေးနှုန်းတွေကို ယှဉ်ကြည့်တဲ့အခါ အချို့စားသုံးသူတွေက ဈေးအကြီးဆုံးကုမ္ပဏီကို ရွေးကြတာလဲ။”

အဖြေရှာကြည့်ရအောင်။

ဈေးဝယ်သူက သဘောကျလို့ ဝယ်သုံးတဲ့အရာဆိုတာ သင်ရောင်းနေတဲ့ အရာနဲ့ ထပ်တူကျဖို့ ခဲယဉ်းပါတယ်။ တကယ်တမ်းမှာ ဈေးဝယ်ယူဟာ သင့်ကုန်ပစ္စည်းကို ဝယ်နေတာ မဟုတ်ပါဘူး။ သူတို့ဟာ ကတိသစ္စာတွေ၊ မျှော်လင့်ချက်တွေ၊ သင့်ကုန်ပစ္စည်းကို သုံးလို့ ခံစားရတဲ့ စိတ်ကျေနပ်မှုတွေကို ဝယ်ယူစားသုံးနေကြတာ ဖြစ်ပါတယ်။

အော်ဂဲနစ်ဆိုင်က ဒိန်ချဉ်တဘူးကို လေးငါးထောင်ပေးဝယ်တာဟာ ပေးရတာနဲ့ တန်တယ်ထင်လို့ ဝယ်ကြတာ ဖြစ်ချင်ဖြစ်မယ်၊ အရသာပိုကောင်းလို့ ဝယ်တာ ဖြစ်ချင်ဖြစ်မယ်၊ အကောင်းကြိုက်တတ်တဲ့ စိတ်၊ သူများထက်သာချင်တဲ့ စိတ်ကြောင့် ဖြစ်ချင်ဖြစ်ပါလိမ့်မယ်။

ကားနှစ်စင်းယှဉ်ရင် တန်ဖိုးကြီးတဲ့ကားကိုဝယ်စီးတာဟာ ကားစီးတဲ့အခါ လုံခြုံတယ်ထင်လို့၊ အရည်အသွေး ပိုမြင့်တယ်ထင်လို့၊ ဂုဏ်ပိုရှိတယ်ထင်လို့၊ ဇိမ်ပိုကျတယ်လို့ ခံစားရလို့၊ စတဲ့အချက်တွေကြောင့် ဖြစ်ပါတယ်။

ဝန်ဆောင်မှုအရည်အသွေးချင်းတူတဲ့ ကုမ္ပဏီတွေကြားထဲမှာ ဈေးကြီးတာကို ရွေးသုံးရတာဟာ ကုမ္ပဏီရဲ့ ဂုဏ်ထူးဆောင်ဖောက်သည်များစာရင်း ပိုစတာမှာ ကိုယ့်နာမည် ဖော်ပြခံချင်လို့ ဖြစ်ပါတယ်။ ဒါမှမဟုတ် ဈေးပေါတဲ့ ဝန်ဆောင်မှုလုပ်ငန်းထက် ဈေးမြင့်မြင့်တောင်းတဲ့ လုပ်ငန်းကို ပိုပြီး ယုံကြည်လို့လည်း ဖြစ်နိုင်ပါတယ်။

ဆိုလိုချင်တာက ဈေးဝယ်သူအတော်များများဟာ ဈေးဝယ်တဲ့အခါမှာ ဆင်ခြင်တုံတရားနဲ့ ဝယ်တာမဟုတ်ပါဘူး။ ဈေးကြီးရင် ကြီးပါစေ၊ အရည်အသွေးချင်း တူချင်တူနေပါစေ၊ သူတို့ကို စိတ်ကျေနပ်အားရမှုကို ပိုပေးနိုင်တဲ့ ကုန်ပစ္စည်း (သို့မဟုတ်) ဝန်ဆောင်မှုကိုပဲ ရွေးတတ်ကြတာ ဖြစ်ပါတယ်။

ဒါ့ကြောင့် အခြားစီးပွားပြိုင်ဘက်တွေနဲ့ ဈေးကွက်မှာ အပြိုင်အဆိုင်ယှဉ်ပြီး ‘ဖိုက်’ တဲ့အခါ “ဈေးလျှော့ရောင်းမယ်” တို့၊ “သူတို့ရောင်းတဲ့ဟာထက် ငါက ‘အဆစ်’ ပိုပေးမယ်” တို့ စတဲ့ အစီအစဉ်တွေနဲ့ သွားပြိုင်လို့ နိုင်မယ်မထင်ပါနဲ့။

သင်ရောင်းချင်နေတာက မြင်ရတဲ့/ လက်ဆုပ်လက်ကိုင်ပြလို့ရတဲ့ အရာတွေ၊ တိုင်းတာလို့ရတဲ့ ဝန်ဆောင်မှုအရည်အသွေးတွေ ဖြစ်ပါတယ်။ ဒါပေမယ့် ဈေးဝယ်သူလိုလားတာကျတော့ လက်ဆုပ်လက်ကိုင်ပြလို့မရတဲ့ စိတ်ကျေနပ်အားရမှု၊ ဂုဏ်ဒြပ်၊ တိုင်းတာသတ်မှတ်လို့မရတဲ့ တန်ဖိုး၊ အစရှိတဲ့ အရာတွေဖြစ်ပါတယ်။ တောင်းသလောက်ပေးရတယ်၊ ဒါပေမယ့် ‘တန်တယ်’ ‘တန်တယ်’ နဲ့ တဖွဖွဖြစ်နေလောက်အောင် လုပ်ပေးမယ့် ဂုဏ်အင်္ဂါရပ်တွေ ဖြစ်တယ်ဆိုတာ မမေ့ပါနဲ့။

ဒီလို ဈေးဝယ်သူ စိတ်တိုင်းကျ၊ နှစ်ထောင်းအားရဖြစ်အောင် လုပ်နိုင်ဖို့ဆိုတာ များသောအားဖြင့် သူတို့ကိုယ်တိုင်က ဈေးရောင်းသူဖြစ်တဲ့ သင့်ကို အရင်ဆုံး သဘောကျနေမှ ဖြစ်မှာပါ။ ကုန်ပစ္စည်း(သို့မဟုတ်)ဝန်ဆောင်မှုကို သင့်ပြိုင်ဘက်တွေနဲ့ ကောင်းကောင်းယှဉ်နိုင်တဲ့အဆင့်ကို ရောက်တဲ့အခါ ဈေးဝယ်သူတွေက ပြိုင်ဘက်တွေကို ပစ်ပြီး သင့်ဆီကို ရောက်လာကြဖို့ သင်ကိုယ်တိုင်က၊ သင့်ဝန်ထမ်းတွေက၊ သင့်ကုမ္ပဏီရဲ့ ဟိတ်ဟန်က ဘယ်လောက်ထိ လူအထင်ကြီးစရာ ဖြစ်နေပြီလဲ၊ စိတ်ကျေနပ်အားရမှုတွေ ဘယ်လောက်ပေးနိုင်ပြီလဲ ဆိုတဲ့ အချက်တွေက အရေးကြီးလာပြီ ဖြစ်ပါတယ်။  

ဒါ့ကြောင့် ဖောက်သည်တွေနဲ့ ထိတွေ့ဆက်ဆံရေးကို ကောင်းသည်ထက်ကောင်းအောင်၊ ဖောက်သည်စိတ်ချမ်းသာအောင်ထားဖို့ အမြဲကြိုးစားနေရမှာပဲ ဖြစ်ပါတယ်။ ဉာဏ်ရှိသလို အသုံးပြုဖို့ပါ။

BusyBook